علاش أتــّـحل الحكومة؟ الأمر بسيط: ما عندها حتى شي شرعية ولا متداد جماهيري، جاها الأمر من الفوق، طـبــّـقاتو بالحرف، هاد القرار أحسن دليل، كايبـيـّـن تهوّر الحكومة، قرار رافضينوا جميع المغربيات، المغاربة، أو اللي بغي يتيقــّـن يقرى  غير التعليقات، الإطلالات، المقالات الواردة فى الصحف الإلكترونية، أمـّـا القنوات الرسمية مهجورة من شحال هادي حتى عـشــّـش فى أوسطها الكساد. 

المصداقية أساسية فى الدول الديمقراطية، فى تدبير الشأن العام، اللي مربوطة أصلا ّ بالثقة، واش كانثيقوا بعدا فى السياسيين دياولنا اللي كايرميوْهم المواطنات، المواطنين بالحجر؟ هاد الشي مرفـوض، إيـّـه، يحتج الواحد، ولاكن بطريقة متحضرة، بالصفــّـارة مثلا ً، باش ما إصـرّفوش كذوبهم فى وذنين الموطنين، لأن إيلا ما ثقناش بيهم، بأقوالهم، فى شخصيتهم، كيفاش غادي  يمكن لينا نثيقوا فى مؤسسات الدولة لـمــّـا كايتقلدوا مناصب مهمة؟ بالأخص إيلا كانت هاد المسؤوليات مرتابطة بقطاعات مصيرية لا من صحة، تعليم، سكن، قضاء إلخ.  

عدم الثقة فى السياسيين، فى الأحزاب ككل هي “سيدة الموقف” فى المغرب، أو هادا ما راجعش لا ألــْـتبخيس السياسة، لا ألـْـرغبة التشهير بهادا أوْ هادي، جوج أمثلة حية: غير “التهافت على غريبة” هادي شي إيـّـامات كايلـخــّـص موقف الكثير منهم، زيد عليها دابا التوقيت الصيفي اللي بغات تفرضوا هاد الحكومة بلا أي دراسة مسبقة، بلا أخذ أو ردّ فى البرلمان، بلا ستطلاع الرأي العام بطريقة شفافة، تقوم بيه شركة مستقلة، موثوف بيها، عندها سمعة طيبة، مشرفة.

اللي دفع المغربيات، المغاربة إسخطوا على هاد التوقيت هو عدم مشاركتهم فى هاد القرار اللي كايمس ّ بطريقة مباشرة حياتهم اليومية، هادا قرار جائر، مشؤوم، اللي تناسات الحكومة هي أن كل مواطن، مواطنة يمكن ليها تعبـّـر عن رأيها فى الأنترنيت، يعني كل فرد رجع “محطة إذاعية” اللي يمكن ليه إشوّش على قرارات سلبية، مستفزة، غير عقلانية، المسؤولين اللوالى على عدم الثقة هوما وزراء هاد الحكومة، بالأخص رئيسهم  اللي كايكذب إيلا دعات الضرورة: “حنا حسن من فرانسا”، غير يقرى تعليقات، يطــّـلع على كاريكاتورات المواطنات، المواطنين فى الأنترنيت باش يعرف بعدا واش هو “على صواب” ولا ّ عايش فى عالم آخور، كايغـنــّـى خار السرّب، خارج التاريخ، غير باش إفهموا هاد السياسيين المغاربة مزيان: “الأخطاء السياسية لا تغـفـر”.

الديمقراطية الحقيقة فى حاجة للثقة، لأن اللي كايثيق فى النظام السياسي، فى المسؤولين غادي يمكن ليه ينخرط، إشارك، إطـوّع، بلا ما إكون كاينتاظر حتى شي مقابل، بحال بعض الشبان اللي زيـّـنوا بعض أحيائهم، قاموا بترميم بعض الحدائق، تحية حارّة من هاد المنبر، لأنه اللي بغى إكون خدوم، يعطي، ضروري إكون شريف الأخلاق، متعفــّـف، معتانق الزهد، ماشي يدخول للسياسة باش يتجر، تكون عندو الحصانة باش إتـــّـهرب من دفع الضرائب، “يسلخ” فى الناس، يستفد، هاد العينة المعـفـــّـنة، ما عندنا ما نديروا بيها، أو إيلا واجهات، هبطات للشارع العام، خاطبات الشعب: عليهم بالصـفــّـارة، يا عمارة، مسكين مشى فيها الشــّـيفور ديال الـتـــّـران، “كبش الضحية”:  

كبش الضحية طالع فى الدروج مدفوع

بــڭـرونـو، شواربو بحواسـّـو مـرفــوع

كايبكي، يشكي، يبزق، يـنـــتر إبعـبـــع

شكون سمعو، شكون سوّلو فاين ترعرع.

جناوى، مناشر غير كايضوروا فـوق راسـو

مشحونين بالحديد، الباروض، الموت باسـو.

بلا رحمة، بلا شفقة، الـڭـزّار رزقـو، ميعادو

الدم الكحل كايجري فى عروقـو، مـدادو.

عاد كان كايرعد، يزبد فى الكون إنقــّـز

رفع كفوفو للسما، فركل، برڭـم، تهـزّ.

شفاتو ناشفين، صـوفـتو واقـفة عـود

يـاك كـولـّـشي غادي ياكـلـو الـدّود.

الرّاعي، المرعي، الواكل، الموكول،

فى الدنيا تايهين، فى الـكــاس غــول.

إيلا قـرّبات الساعة، قـرّب الموري إضور،

تـعـطـّل العـدّاد، اللحم، الـغـلــّـة تبور.

ضروري تقوم شي شركة مختصة فى ستطلاع الرأي باش نعرفوا مستوى شعبية السياسيين المغاربة، على ما كانظن هوما التــّـاليين، فى الدول الديمقراطية بحال فى فرانسا أو هوما فى مراتب متدنية، ما حساك  المغرب، أو عاد كايجيوْا أو يبداوْا إكذبوا، إتــّـبوحطوا: “والله إيلا مظلومين”، غير أخيرا قال أمحند العنصر “يجب تشبيب أطر الحزب”، الله أكبر! أو هو كثر من 30 عام رايـس “حزب الحـركة”. 

هادوا كايدفعوا لا الشباب، لا الشرفاء باش ما عمـّـرهم إشاركوا فى العملية السياسية، لأن “ثقافة عدم الثقة” هي اللي متواجدة بقوة، لذلك يمكن لينا نقولوا بأن وضع الديمقراطية اليوما هش، مسيطر عليه عدم الإستقرار، كاين ستقرار نسبي، مترشح أتـفـجـّـر الأوضاع فى كل وقت، عدم الثقة راجعة بالأساس ألــْـبزاف ديال العوامل: 

1. الغموض أو الخوف من المستقبل   

2. عدم رؤية واضحة فى كيفية تقليص الفوارق الإجتماعية

3. عدم الشفافية أو إشراك المواطنين فى القرارات المصيرية ولا ّ اليومية

4. ما كاين حتى شي فرق بين هاد الحزب أوْ لاخور، كولهم مهووسين 

  غير بالسلطة أو المنصب 

5. متهان الكذب أو التملص من المسؤولية، أحسن دليل: عمارة، المسوؤل

    السياسي اللول على كارثة “بوقنادل”، شحال زوينة هادي: “صحابين

    المصباح”، “القنادل”، القدر ما كايرحمش بعض المرات

6. الزبونية أو المصالح الشخصية فوق جميع الإعتبارات

7. خطايا بعض السياسيين، بحال يتيم، فى عوط ما حل ّ مشاكل المغاربة 

    ملهي بحال شي مراهق فى حـبــّـو، كاين اللي كايكبر أو يختر، لاخور 

    كايكبر أو يهتر

الثقة توقيع “على بياض”، قبل ما إقولوا بسم الله ما مشاوْا هادوا حتى سحقوا “لا شارج”، رصيدهم، يمكن لينا نعتابروا الثقة من الدعامات الأساسية للديمقراطية، هاد الكم الهائل من عدم الثقة “مثير للقلق” اللي كايشـكـــّـل مصدر خطر فتاك بالنسبة ألـْـهاد النبتة الفتية، الديمقراطية المغربية، أو جميع الأحزاب المغربية كاتعاني من هاد الظاهرة، لأنها حرقات بريقها، مصدقيتها لمـّـا وكــّـلات سياسيين نتهازيين بداوْا كاينـقـّـزوا من وزارة ألـْـوزارة، من منصب ألـْـمنصب، من مقعد برلماني ألـْـمقعد برلماني حتى ما بقى ألــْـمصداقيتهم أثر، خايفين اليوما من الشعب، شـادّين  عليهم فى صالات “ماسونية” مغلقة، حاضينها شبان مفتولين العضلات.     

كون كانت الأحزاب السياسية المغربية قايمة بالدور ديالها ما عـمّـر شي حـدّ إتــّـجرّء يسرق، إعـرّي جرحى، قـتلى، منكوبين على إثر فاجعة “بوقنادل”، لاش إليقوا الأحزاب إيلا ما كان ليهم أثر؟ عاد باغية تزيدهم الدولة الفلوس؟ لاش؟ مكافأة الفشل؟ كيف قال نعام تشومسكي: “ما كاين دولة فقيرة، كاين غير حكومة، دولة فاشلة”، سويسرا على سبيل المثال، عندهم غير الجبال، ولاكن دولة مصنعة ناجحة، الصناعة هي الحل، أمـّـا الفلاحة، بالفعل مهمة، ولاكن ما غاديش توفــّـر بكثرة للشباب فرص الشغل، علاش نجحات كوريا الجنوبية؟ لأنهم ركــّـزوا على الصناعة، ماشي على الفلاحة، بالنبسة للصين نفس الشي اللي كانت دولة فلاحية بامتياز من قبل ، الفيطنام كذلك اللي راهم فى الطريق، أو جميع الدول الغربية راكمات ثروة مهمة عن طريق الصناعة ماشي الفلا حة.  

 التطرف الديني، عدم الأمن راجع بالأساس ألــْـفشل العمل الحزبي المغربي، ألــْـعدم الثقة فى المؤسسات، لأن اللي ما كايسمع ليه حـدّ، كايعمل شرع يـدّيه، هاد الظاهرة كاينة فى جميل الدول، حتى فى الدول الديمقراطية العريقة.  

إيلا بغينا نمشيوْا ألــْـقـدّام، نقضيوْا على هاد الظاهرة، ضروري إكون تجاوب، تناغم بين الـرّاع أو المرعي، ماشي تجي هاد الحكومة أو تفرض على المغاربة توقيت مرفوض، المغاربة، المغربيات ما يأسينش من السياسة، من الديمقراطية، بالعكس مهتمين بها، أو ديما كايقـيــيــّـموا العمل الحكومي، مصاحبين جميع القرارات “عن كثب”، لا من حيث كفاءات المتدخلين السياسيين، تأثيرهم، رؤيتهم، شخصيتهم، نطباعاتهم، كيفية تعاملهم مع بعض الوقائع، وعودهم، فى نظري، كثير من المغاربة، المغربيات كاينتاظروا ثلاثة ديال الحوايج من هاد الناس: 1. خدمة الشأن العام، “قولا ً وفعلا ً، 2. عمل مسؤول، هدفو التضامن، العدالة، تدبير، ترشيد النفقات، الشفاقية، 3. الإستقامة، الكفاءة الأخلاقية، بلا كذوب ولا فضايح، أو هاد الثلاثة ديال النعاصر مرتابطين بالثقة، الثقة “وما أدراك ما الثقة”، هي بوحدها اللي غادي تـقـرّبنا من بعضياتنا.