شكون غادي يفهم هاد البلاد؟ إيلا عرفنا أن 15 فرد على 19 كانوا حاملين جنسيات سعودية غير قاموا بهجمات إرهابية ضد ميريكان فى عام 2001، الإرهاب مرتبط أساسا بالمذهب الوهــّـابي المتزمت أو الكراهية، الحقد اللي كايكنّ ألــْكل واحد ما كانش مسلم، بحال إيلا الإسلام كان مقتصر فقط على العرب أو اللي كايضور فى فلكهم، عاد إيجيوْا هاد الناس أو إقوموا بخلق ائتلاف ضد الإرهاب، قادّ حالتك بعدا أو حلّ مشاكلك عاد طلب منـّـي نساعدك، فى هاد الحالة بحال إيلا كـلـــّـفـتي الـجـّـدي يحضي  ليك الجـّـردة. 

شنو غادي ننتاظروا من هاد البلاد اللي باقية كاتجلد الناس “علانية”، تقطع الرّيوس ألـْـعباد الله بحال داعـش، اللي كاتقمع الـنــّـسـا ولا ّ المواطنين دياولها فى حالة إيلا نتاقدوا همجية النظام، ستعباد الناس، تصدير الإرهاب، ستغلال فقر المهاجرين؟ شنو ذنبهم؟ طالبوا بحرية التعبير! كيفاش غادي يمكن ليك تكـوّن تحالف مع هادوا اللي كايعتابروا لاخور ناكرة، ولا ّ حسن غير عبد “محدود الصلاحية”؟

حماق هاد الناس والله ما إفهمو حـدّ، غير ضرب الإرهاب مرة اخرى مجلة فرانساوية، طلّ علينا مسؤول سعودي كبير من الصفوفة اللـولى أو هو كايمشي مع الموكب تحت شعار “حرية التعبير”، بالفعل النفاق ما عندو حـدّ، لا فى الدنيا ولا فى الآخرة اللي كايخلعونا بيها ديما شيوخهم حتى كايبداوْا إشهقوا فى الجوامع أو الـفضائيات بكثرة محبة الله، الرسول أو الموت اللي كايتسنــّـاوْا بالدقايق، فى تلهف أو شوق، خلــّـينا بعدا نعيشوا حياتنا، أو من بعد نتحاسبوا!   

علاش رْمات السعودية المدوّن رائف بدوي فى الحبس فى يونيو 2012؟ لأنه نتاقد ظلم، هيجان النظام أو طغيان المذهب الوهابي أو عـرّا ليهم على الا ّص أو على النظام اللي قايم على جوج ركيزات: التعصـّـب الديني الأعمى أو النفاق، فى نفس الوقت كانلقاوْا جنب بجنب “دولة إسلامية متزمتة” أو “أمراء اللي ما بقى ليهم غير إعوموا فى الويسكي أو الشـّـامبانيا” فى عاصمات الدول الغربية اللي كايرفضوا فى الأصل، حامي الملة أو الدين، ولاكن فى نفس الوقت الحليف الوفي ديال “الكفار الميريكانيين”، الحليف الكبير ضد القاعدة أو المقاتل العنيد ضد إرهاب الدواعش اللي تموّلوا فى البدو من طرف مواطنين سعوديين، مكافح شرس ضد الإسلام السياسي ولا كن أكبر مصدر فى العالم ألإسلام الوهـّـابي العدواني المتزمت، دولة غنية، من تحت رجليها المياوات ديال الملاير ديال الدولارات ولاكن كاتعامل الناس اللي كايخدموا عندها، لا فى ديورها ولا ّ فى معاملها، ببخل أو بطريقة غير إنسانية. 

ولاكن إمبراطوريات البترول أو الغاز أيامها محدودة، لا الغـرب ولا دول خرى لقات مصادر جديدة أو كيفاش يمكن ليها تـغـدّي قتصادها بطاقات متجددة نظيفة، لا من شمس، ما، ريح ولا ّ عن طريق رفع الفعالية، أو هادا هو السبب الأساسي علاش دول الخليج ما بقاش عندهم داك الوزن الستراتيجي اللي كانوا كايتمتــّـعوا بيه البارح، بريق، نفوذ أو قوة البترول السياسية أو التجارية بدات كاتــّـراجع بكثير، لازم ما نستغربوش إيلا أثمنة البترول كاتــّـوجه اليوما “نـحـو الحضيض”. 

دولة اللي كاتعاقب مواطنيها أو كـل واحد نتاقد سياستها بالهرمكة ما إكون عندها غير تصوّر فريد من نوعو فى ما يخص الرحمة أو الشفقة، حتى فى السعودية كاينين قوانين أو أعراف، لازم على الجلا ّد إكون كايحمل مصحاف تحت باطو باش ما إقصـّـحش الشخص اللي كايعاقب، ولاكن البوليسي اللي جلد بدوي ما كان عندو مصحاف، همجية عقوبة المثقف رائف بدوي ما كادلــّـش على قوة العائلة الحاكمة ولاكن على عمق أزمتها. 

لأن قوة بدوي ماشي نابعة من أقوالو بالأخص، ولاكن من الإنتيرنيت، الوسيط اللي كايستعمل أو إخاطب بيه السعوديين، العرب ولا ّ اللي كايعرف يقرى لغـتهم، كثر من  5  مليون ديال السعوديين كايستعملوا الفايس بوك، السعوديين كايحتلـّـوا المرتبة الثالثة عالميا فى ما يخص نسبة ستعمال التليفون الذكي، أو هاد الشي كايشكــّـل بالفعل خطر على العائلة الحاكمة اللي منصـّـبة تقريبا فى كل جهة من جهة المملكة طرف من عائلتها ولا ّ اللي تحت طاعـتها، يعني صبــّـاطها، أو هادا ضرب غير مقبول من هوس تضخم الآنا أو المحسوبية الحمقاء، أو كامثقفين ضروري نطالبوا “بطلق سراح رائف بدوي فورا”، أو هاد 18 ديال الناس اللي حازوا على جائزة نوبل، لا من كتاب، أطبة،  فزيائيين إلخ ناس ناضجين، ما لاعبش ليهم الحماق السّـلالي بمخهم، أو ما لـقاوْا ما إديروا غير طلبوا الإفراج على بدوي، أمـّـا البرلمان الأوربي ما مْـشى حتى ثـمّن أو عزّز موقف بدوي أو قام بتكريم حرية التعبير فى السعودية لمـّـا حصل هاد الأخير على جائزة قدرها 50 ألف أورو، ولاكن مع الأسف، والله حتى إهزمك الجهل، لأن المعاند، المتعصب كايرفض الحجة أو الدليل، مرحبة بيك فى “خـُـرافانيــســْــتـــان”.