cron lakome2 - لكم :موقع إخباري مستقل cron
  1. البرلمانية ماء العينين: بنكيران ليس حائطا قصيرا واحتجاج أساتذة الغد تم استغلاله والركوب عليه
  2. تعالوا نخفي سوط الله وسيفه
  3. بالصوتI خطيب جمعة بسلا: المحذرات وراء زلزال الريف.. والجفاف عقوبة إلهية
  4. "راجعين"
  5. الحكومة تهدد الأساتذة المتدربين بالإعلان قريبا عن "سنة بيضاء"
  6. بالفيديو.. بنكيران: إضراب 24 فبراير ليس إعلان حرب وسأستمر في إصلاح التقاعد مهما كانت الظروف
  7. الكونفدرالية الديمقراطية للشغل: الإضراب العام حقق نسبة مشاركة فاقت 85 في المائة إلى حدود الظهيرة
  8. كريم التازي لـ"فاينانشل تايمز": مصالح قوية في النظام ستحاربك اذا كنت ترغب في محاربة الفساد
الرئيسية | رأي | خاصّنا نكتبو لمازغيا بلحرف لّاتيني و نقرّيو دّاريجا و نّگليزيا

خاصّنا نكتبو لمازغيا بلحرف لّاتيني و نقرّيو دّاريجا و نّگليزيا

آخر تحديث: 15 سبتمبر, 2018 01:27:00

باش نجريو على لفرانصاويا من لمغريب و نشطّبو لفرانصاويا من لمغريب و نسيّقو لفرانصاويا من لمغريب و نصاوبو تّعليم لمغرابي لمهلوك واجب على لمخزن يبدّل سّياسا لّوغاويا ديالو من جّدر و من دابا. و واجب على نّاس يبدّلو لعقليا لّوغاويا ديالهوم إيلا بصّح بغاو يصاوبو نّيظام تّعليمي لمغرابي. 

فلّوّل گاع، خاصّنا نفهمو مزيان بلّي لّوغا لمازْغيا عندها لّاهاجات دياولها و لّوغا دّاريجا عندها لّاهاجات دياولها. إيدان ها لّي كاين: 

- لّوغا لمازْغيا كا نجبرو فيها: لمازغيا ديال رّيف (Tmaziɣt)، لمازغيا ديال لاطلاس (Tamaziɣt)، لمازغيا ديال سوس و جّنوب شّرقي (Tacelḥit). 

- لّوغا دّاريجا كا نجبرو فيها: دّاريجا دّكُّاليا ديال دكُّالا (ديال أنفا)، دّاريجا لمرّاكشيا، دّاريجا جّبليا (ديال طانجا)، دّاريجا شّرقيا (ديال وجدا)، لحسّانيا. 

باش نجريو على لفرانصاويا و نصاوبو تّعليم لمغرابي ضاروري سّياسا لّوغاويا فلمدراسا تتبدّل. ها كيفاش: 

1 - خاصّنا ننجّحو تّعليم ديال لّوغا لمازْغيا Tutlayt Tamaziɣt. هاد شّي علاش خاصّها تتقرّا بلحرف لّاتيني لعالامي و تدخل تّعليم تّاناوي من دابا، بلا ما نتسنّاو حتّى تغطّي تّعليم لبتيداءي كولّو. لّوغا لمازْغيا لّي خاصّها تتقرّا فلمدراسا هيا لّاهاجات لمازغيين شّعبيين مجموعين فكتاب مدراسي واطاني واحد موحّد. لّوغا لمازغيا ما فيهاش "لفوصحى" والا "لميعياريا"، هادا غي تخربيق. لّوغا لمازغيا هيا لمجموع ديال گاع لّاهاجات شّعبيين دياولها. 

لوستاد لكبير محمد شفيق لّي ءلّف "المعجم العربي الأمازيغي" (لّي فيه تلاتا ديال لموجلّادات و خدم عليه كتر من 25 عام) راه ما ختارعش "لوغا مازغيا فوصحى" جديدا ولّا "لوغا مازغيا ميعياريا" جديدا. لّا. محمد شفيق غير جمع لكلمات و تّعبيرات ديال لّاهاجات لمازغيين من گاع تامازغا و ستّفهوم و حطّهوم فواحد لقاموس. صافي. هادا ما كان. 

إيوا علاش نعقّدو لقاضيا بهاد تّخربيق ديال "لمازغيا لميعياريا" و "لمازغيا لفوصحى"؟! 

إيدان، لّوغا لمازغيا هيا لمجموع ديال لّاهاجات دياولها بحال لقاموس ديال محمد شفيق. 

2 - خاصّنا نقرّيو لّوغا دّاريجا حتّى هيا فلمدراسا. 

والاكين كيفاش غادا تتقرّا هاد دّاريجا؟ 

واش لوغا بوحدها، يعني مادّا مدراسيا بوحدها؟ 

ولّا تكون مخلّطا معا لعربيا لفوصحى فواحد لكتاب لمدراسي؟ 

هاد شّي ما غا ندخلش فيه و غا نخلّيه لمّوالين دّاريجا يتناقشو و يتداكرو فيه و يشوفو بيناتهوم شنّي غا يعملو فيه. 

و بزّاف ديال نّاس كا يگولو ليك: علاش زعما خاصّنا نقرّيو دّاريجا؟! شنو هوا نّفع ديالها؟ لاش غا تصلاح؟ واش غا نطلعو بيها للقامار؟! 

رّدّ على هاد سّوال و هاد تّمسخير هوا: علاش گاع ما شفناکش آ ظّرافات طلعتي للقامار بلعربيا لفوصحى ولّا بلقاصيدا ديال امرؤ القيس ديال "مِكَرٍّ مِفَرٍّ مُقْبِلٍ مُدْبِرٍ مَعاً..."؟! و گاع ما طلعتيش للقامار بلفرانصاويا ديالك ولّا بلفخونصي ديالك! 

إيوا زيد! تفضّل طلع للقامار! ياك عندك لعربيا لفوصحى و لفرانصاويا؟! إيوا فين صّاروخ نتاعك؟! فين صّاروخ نتاع لمغريب؟! 

شوف. دّاريجا بحال لمازغيا هيا لّوغا لومّ ديال شّعب لمغرابي. تّعليم و شّرح ديال لعولوم كا يسهال و كا يخفاف بلّوغا لومّ. لفهاما ديال دّرس كا تسهال على تلّميد و طّالب، لكبير و صّغير، فلبتيداءي و لجاميعا بلّوغا لومّ. دغيا كا يفهم دّرس ديال لحساب ولّا لفيزيا. 

و بلّوغا لومّ كا تكون عند تّلميد تّيقا و زّعاما باش يتناقش معا لموعلّيم و لوستاد. شّرح بلعربيا لفوصحى ولّا بلفرانصاويا كا يصعّب لخدما على لوستاد و تّلميد و طّالب و كا يخلق ليهوم ماشاكيل هوما ما محتاجينهومش. 

فلمدراسا ديال دابا كا نجبرو فلقيسم تلاتا ولّا ربعا ديال "لموجتاهيدين" لّي كا يقدرو يتبّعو اش كا يگول لوستاد بلعربيا لفوصحى ولّا بلفرانصاويا (حيت عندهوم ماهارات لوغاويين فوق لعادا)، امّا شّياطا ديال شي تلاتين ولّا ربعين ديال تّلامد فلقيسم تا نجبروهوم ما تا يقدروش يتبّعو لهضرا و دّوي ديال لموعلّيم و لوستاد بهاداك تّخربيق لينشاءي ديال لعربيا لفوصحى و لفرانصاويا و كا يزگلو لفهاما ديال دّرس. إيوا هادوك دابا حنا كا نسمّيوهوم "كوسالى" و هوما ماشي كوسالى والاكين هوما ضاحايا ديال هاد تّفليا و تّريگيل و لغومّايضا و لعونف و تّمرميد لّوغاوي لّي كا يتمارس عليهوم بلعربيا لفوصحى و لفرانصاويا عام مورا عام من تّحضيري للباكالوريا. 

تّلميد لمغرابي ما تا يتعلّمش يفكّر و يحلّل و يناقش معا لموعلّيم و لوستاد بلّوغا لومّ ديالو لمازغيا و دّاريجا. هاد سّيستام تّعليمي كا يردّ تّلميد ماكينا ديال لحفاظا و لعراضا ديال لينشاء لعربي لفوصحاوي و لينشاء لفرانصاوي. هاد شّي علاش ما كا يشوف تّلميد فلمدراسا غير تامّارا. ديما خصّو يحفظ و يعرض و يقلّع فتّخربيق و تّخرميز لمكتوب لّي ما فاهم منّو والو. 

ديما نهار كامل هاد تّلميد لمغرابي لمسكين لمنحوس كا يتدابز معا شي لوغات أجنابيين عليه فـ"قراءتي" و"دّرس لّوغاوي" و"تّشكيل بلفتحا و ضّمّا و لكسرا و شّدّا" و "ليعراب" و "لقاصيدا" و لحفاظا ديال لحزاب ديال لقورءان و تّخربيق ديال La lecture و لهبال ديال L’expression écrite و تّخرميز ديال Conjugaison و لفضيحا ديال L’oral فاش كا يفرضو على تّلميد لمغرابي يولّي درّي فرانصاوي من مدينت Paris بحال إيلا زعما راه فرانصاوي كا يدوي بلفرانصاويا فدّار و شّاريع فلمغريب! 

بهاد تّعليم لمغرابي لمقلوب لمهبول لّي ما عندو لا راس لا ساس كا يبقى تّلميد لمغرابي ديما موضّر و ضايع و حاصل فلّوغات و مشغول بلّوغات (بادال ما يكون مشغول بلحاصول لّي هوا لعولوم)، و ديما ما فاهمش على اش كا يهضرو هادوك نّاس فهادوك لكتوبا ديال لمدراسا و ما عارفش لموضوع لّي كا يهضر و كا يبغبغ عليه لوستاد بلفوصحا و لفخونصي حتّى يفوت لفوت. 

ها علاش سّكويلا لمرّوكيا ما كا تنتج لينا فنّص لكبير ديالها غير لمكلّخين لمعوّقين فلّوغا و لمكفّسين فلفهاما. 

فبلادات دّنيا دّيموقراطيين بحال سويسرا و لميريكان و المانيا و هولاندا و دّانمارك و بلجيكا و طّاليان و نّورويج و كانادا تّلميد كا يمشي للمدراسا باش يتعلّم كيفاش يقرا و يكتب لّوغا لومّ ديالو (ديال دّار و شّاريع) و كيفاش يحسب و يلعب و يناقش بيها لمواضيع. 

فلمغريب لقاضيا مقلوبا. لّوغا شّعبيا لومّ ممنوعا و تّلميد كا يولّي كا يضيّع طاقتو في لحفاظا ديال جوج لوغات جداد عليه (لعربيا لفوصحى و لفرانصاويا) بلا ما يفهم تقريبان حتّى شي حاجا منّهوم. ما كايناش شي فضيحا كبر من هادي. 

لهادف فهاد تّعليم لمغرابي لمهلوك ولّى هوا أنّا تّلميد يحفظ لعربيا لفوصحى و لفرانصاويا ماشي يفهم لعولوم و يطوّر تّيقنيات و لماهارات ديال نّيقاش و لحيوار و تّحليل. 

ها علاش لّوغا لومّ موهيمّا. لّوغا لومّ هيا باش تا يقدر تّلميد يتعلّم حوايج خرين و يطوّر راسو و ينشّط دّماغ ديالو و تّخمام ديالو. 

غا يجي شي واحد اخور يگول ليك: إيوا راها دّاريجا فيها بزّاف ديال لّاهاجات، ها لمرّاكشيا، ها جّبليا، ها لوجديا، ها دّكُّاليا، ها لحسّانيا، راهوم غادين يتدابزو بيناتهوم على اشمن لهجا غا تكون هيا نّمرا واحد فتّعليم و ما غا يتفاهموش بيناتهوم! 

رّدّ على هاد شّي هوا: علاش نتا ديما ناوي لحرب لأهليا؟! شكون قال ليك لمرّاكشي غادي يدير حرب أهليا معا لوجدي ولّا طّانجاوي على لّهجا؟! راه لّوغا دّاريجا فيها لاهاجات كيمّا لمازغيا فيها لاهاجات. نّاس ديال دّاريجا يقدرو يگادّو هاد لّاهاجات شّعبيين بشويّا ديال لعقلانيا و يجمعوهوم فواحد لكتاب لمدراسي لواطاني لموحّد بشويا ديال تّاوازون بلا ما تطغى و تتفرعن شي لهجا على اخرى. 

3 - خاصّ دّوروس ديال لحساب و نّاشاط لعيلمي و لفيزيا و تّاريخ و لجغرافيا و لفلسافا كولّهوم يتشرحو لتّلامد بلمازغيا و دّاريجا على حساب لّوغا لومّ ديال تّلامد. 

ماتالان: إيلا لقيسم فيه نّص لكبير ديال دّراري كا يهضرو دّاريجا إيوا لموعلّيم ولّا لوستاد خاصّو يشرح ليهوم دّرس بدّاريجا، و إيلا نّص لكبير ديال تّلامد كا يدويو لمازغيا خاصّ لموعلّيم ولّا لوستاد يشرح ليهوم دّرس بلمازغيا. إيلا لقيسم نصّ نصّ إيوا يشرح لوستاد بدّاريجا و لمازغيا و يخلّط بيناتهوم. 

و لمزيّا ديال دّاريجا و لمازغيا هيا أنّاها كا تعاون تّلميد دغيا يفهم لموضوع ديال دّرس و يفهمو نيشان بلا تامّارا و يقدر يناقش لموعلّيم و لوستاد كيمّا كا يناقش باباه و يمّاه فدّار. 

هاد سّيستام ديال شّرح ديال دّوروس بلفوصحى و لفرانصاويا و لكتبا ديال لقاواعيد و لمولخّاصات بلفوصحى و لفرانصاويا راه غير پروتوكول و تمتيليا بحال رّورسوم لموتحرّيكا ولّا فحال شي مسراحيا. تّلميد و طّالب ما كا يستافدش و كا يولّي غي مومتّيل فمسراحيا لوغاویا. 

و هاد سّيستام تّعليمي لمغرابي لخاسر كا يسخسخ تّلميد و كا يتقّل عليه فنّقيل ديال هادوك لمولخّاصات بلعربيا لفوصحى و لفرانصاويا من سّبّورا بلا فهاما. نهار كامل تّلميد خدّام ردّام كا ينقش بسّتيلو زّرق و لحمر و لخضر و لكحل فدّفاتر. شي حاجا ما تعلّمهاش و شي فايدا ما كايناش. فبلاصت ما يخدّم تّلميد و طّالب دّماغ ديالو فلفهاما ديال لموضوع لعيلمي ولّا تاريخي ولّا لجوغرافي كا يولّي كا يخدّم دّماغ غیر باش یتبّع و يفهم لفوصحى و لفرانصاويا و باش يتقمّص دّور نتاع لعربي ديال قورايش ولّا لفرانصاوي ديال پاریس. 

لحاجا طّابيعيا فلمدراسا هيا أنّا لّوغا تكون ادات ديال لقرايا و لفهاما و تّعليم ديال لعولوم ماشي تكون لّوغا هاداف براسها. تّعليم بلمازغيا و دّاريجا كا يعاون تّلميد و طّالب ينقّز على لحاجيز ديال لّوغا باش يدخل نيشان فلمعقول و لحاصول لّي هوا دّرس ديال لعولوم ولّا تّاريخ ولّا لجوغرافيا ولّا لفلسافا. 

4 - خاصّنا نقرّيو نّگليزيا و نديروها لوغا أجنابيا إيجباريا فلمغريب من تّعليم لبتيداءي تال لباكالوريا. يعني خاصّنا نزوّلو صّيفا ليجباريا من لفرانصاويا و نخلّيوها لوغا ختياريا فتّعليم تّاناوي يقدر طّالب يختارها إيلا رشقات ليه، بحالها بحال لالمانيا و صّبنيوليا و طّاليانيا لّي كا يتقرّاو فتّاناويات ديال لمغريب دابا. 

تقريبان گاع لمغاربا و گاع لمازغيين فتامازغا كا يتّافقو بلّي لفرانصاويا ما بقاتش كا تصلاح لينا و خاصّنا نسيّقوها و نجريو عليها من لمغريب و من تامازغا و نقرّيو نّگليزيا. 

والاكين خاصّنا نعرفو بلّي لفرانصاويا راها مغروسا بحال سّاراطان فكولّ لموءسّاسات و لماصاليح ديال لمغريب (صّبيطارات و ليدارات و لجاميعات...). موستاحيل نجريو على لفرانصاويا فدقّا وحدا. لمغريب غا يتّبلوكا. 

لحلّ هوا نخرّجو لفرانصاويا من دابا من گاع لبلايص لّي نقدرو نخرّجوها منّهوم بلا خسارا و بلا بروصي. و لبلاصا لّوّلا هيا تّعليم لبتيداءي و من بعدو تّعليم ليعدادي و من بعدو تّاناوي و من بعدو لجاميعا. و من بعد داك شّي يقدر لمغريب يشطّب لفرانصاويا من لموءسّاسات و ليدارات و صّبيطارات و يحطّ بلاصتها لمازغيا و دّاريجا معا لعربيا لفوصحى و نّگليزيا. 

مادام دّولا لمغرابيا ما باغياش تخرّج لفرانصاويا من تّعليم لبتيداءي دابا إيدان هيا ما ناوياش تخرّجها من لمغريب فهاد لقرن 21 لّي كا نعيشو فيه. خاصّ شّعب لمغرابي يضغط على دّولا و لحوكوما باش تخرّج لفرانصاويا من لمدراسا لبتيداءيا دابا و تحطّ بلاصتها نّگليزيا. 

(ولّا شّعب لمغرابي فالح غير فلحگرا على دّاريجا وتّمسخير على دّاريجا؟!) 

لخطوا لّوّلا ديال تخراج و تسياق لفرانصاويا من لمغريب هيا نحبسو تّعليم ديالها فلمدراسا لبتيداءيا دابا ضروك فلحين و ندخّلو نّگليزيا فلبتيداءي باش تتحطّ لياجورا لّوّلا فلبني ديال لجيل جّديد ديال لمغريب. 

و زايدون، نّگليزيا لّي خاصّها تتقرّا فلمغريب ماشي هيا نّگليزيا لبريطانيا (لّي كا تتقرّا دابا فتّاناوي – حيت لمغريب كا يقلّد فرانصا فكولّشي، حتّى فهادي). نّگليزيا لّي خاصّها تتقرّا فلمغريب هيا نّگليزيا لميريكانيا. 

و بلا ما نشرّح و نملّح فعلاش و كيفاش. راه لوزن ديال لميريكان باين. 

و لعربيا لفوصحى كيفاش؟ 

مادام شّعب لمغرابي باغي لعربيا لفوصحى إيوا من حقّو يبقى يقراها و يقرّيها. مادام شّعب باغي لعربيا لفوصحى غادا تبقى لعربيا لفوصحى حتّى هيا لوغا رسميا و لوغا كا تتقرّا فگاع لماداريس و لجاميعات. 

لموشكيل ديال ليسلاميين و تّعريبيين هوا أنّاهوم كا يبغيو يروّجو و ينشرو لعربيا لفوصحى و يقتلو لّوغات لخرين بحال لمازغيا و دّاريجا. ليسلاميين و تّعريبيين ما كا يآمنوش بلفلسافا ديال "عيش و خلّي نّاس يعيشو" ولّا "لعربيا لفوصحى تعيش و لمازغيا تعيش و دّاريجا تعيش". لّا لّا لّا، هوما كا يآمنو بلفلسافا ديال "إما قاتلا وإما مقتولا" أولا "تغدّا بيه قبل ما يتعشّا بيك". هوما باغيين لعربيا لفوصحى تعيش بوحدها و تسيطر بوحدها و لّوغات لخرين يموتو باباهوم. و لّي كا يرفض هاد شّي كا يقولو ليه: نتا عاميل ديال لموساد و لموخابارت ديال فرانصا و نتا كا تنفّد لموخطّاط صّهيوني صّاليبي لفرانكوفوني! 

ليسلاميين و تّعريبيين حاولو من شحال هادي و مازال كا يحاولو يقتلو لّوغا لمازغيا و يمنعوها من تّعليم و تّرسيم، و گالو بلّي لمازغیا موءامارا صهيونيا فرانكوفونيا والاينّي فلّخّر بانو كدوباتهوم لنّاس. 

دابا ليسلاميين و تّعريبيين كا يخدّمو هاديك سّتراتيجيا نيت معا دّاريجا. هاديك لكاسيطا نيت: موءامارا صهيونيا ... موءامارا فرانكوفونيا ... تّقسيم ... محارابت ليسلام ... تّنصير ... تّبشير ... تفتيت لمغريب ... فصل لمغريب على لموحيط ديالو لعربي ليسلامي... 

(و طبعا لمغريب بلاد مازغيا ماشي عربيا). 

لموهيم. لكاسيطا ديال ليسلاميين و تّعريبيين معروفا و محفوظا. ما عندهومش حولول للماشاكيل ديال تّعليم و لّوغا و لقتيصاد من غير لمنع و لستيبداد و تّحريم و تّخوين و تّشويه و تاحراميات. 

اجيو دابا نرجعو لدّاريجا فلقاضيا ديال لحرف. اشمن حرف خاصّها تتقرّا بيه؟ واش بلحرف لعربي ولّا بلحرف لّاتيني ولّا بلحرف ديال تيفيناغ ولّا بشي حرف اخور (بحال لگريگي ولّا رّوسي)؟ 

هاد لقاضيا متروكا لمّوالين دّاريجا. هوما لّي خاصّهوم يخمّمو فيها و يشوفو مصلاحت دّاريجا فين كاينا، و هوما لّي خاصّهوم يفتحو نيقاش واطاني فهاد لقاضيا إيلا هوما بصّح باغيين دّاريجا تتقرّا و يتّشرحو بيها دّوروس فلمدراسا بواحد شّكل منظّم و منهاجي و مگادّ مزيان. 

انا دابا كتبت هاد لماقال دّاريجي بلحرف لعربي حيت نّص لكبير ديال لّي كا يكتبو دّاريجا على لينترنيت و فتّعليقات كا يخدّمو لحرف لعربي. 

بنّسبا للمازغيا راها مصلاحتها كاينا معا لحرف لّاتيني لاحقّاش هوا لحرف لعالامي لّي غا يضمن ليها لنتيشار سّريع فلمغريب و لخاريج، و حيت لابحات و دّيراسات لّيسانيين ديال لمازغيا معمولين و ما زال كا يتّعملو بلحرف لّاتيني. و نّص لكبير ديال ليبداع لادابي و شّيعري لمازغي مكتوب بلحرف لّاتيني فلمغريب و دزاير و گاع تامازغا. 

و فلّخّر خاصّنا نفهمو قاضيا خاطيرا بزّاف و هيا أنّا "دّيموقراطيا" كلما گريگيا (dēmokratiā) معناها: "لحوكم ديال شّعب". و لحوكم ديال شّعب ما يمكنش من غير لّوغا ديال شّعب. 

دّيموقراطيا فلمغريب ما تقدر تكون غير بلّوغا ديال شّعب: لمازغيا و دّاريجا. 

لا يوجد كلمات دلالية لهذا الموضوع

التعليقات ( الآراء الواردة في التعليقات تعبر عن آراء أصحابها وليس عن رأي الموقع )

المجموع: | عرض: